اتفرجت على فيلم اسف على الازعاج الفيلم قصته عجبتنى قوى حسيت انها مست حاجة فيا مش عارفة يمكن الحدوتة عجبتنى
الفكرة بتاعة الفيلم بتعتمد على الارتباط القوى بين الواحد واللى بيحبهم البطل فى الفيلم كان مرتبط بأبوه وحبيبته وطبعا لأنه بيحبهم قوى كان رافض فكرة أنهم ماتوا .
فضل البطل عايش معاهم شايفهم وشايفينه وحياته مكتملة بيهم وحصل له تغيير للأحسن لما بقت حبيبته فى حياته وده ساعده أنه يعمل حاجات كان بيخاف منها ده لأنها كانت فى حياته وغيرتها للأفضل.
هو ده الطبيعى أنك تتغير لما تلاقى حد جنبك بيحبك وبيساعدك على التغيير ده ويفضل جنبك.........
يمكن نفس الموضوع مر علينا كلنا فينا اللى كان مرتبط بحد عزيز عليه وفارقه بس غصب عنه حاجة قدرية صعب أننا نمنعها زى ما حصل مع البطل حبيبته وأبوه ماتوا.... فارقوه بس مش بايديهم ولا بايديه.
بس احنا فى حياتنا ممكن نفضل نكون عايشين مع ناس عايشين جوانا رغم أنهم قرروا أنهم يفارقونا بارادتهم ومن غير سابق انذار بيفضلوا عايشين جوانا ومعانا بس كسراب رغم ان السراب ده ممكن يكون حقيقة بس هما فضلوا يسيبوك بارادتهم هما. من غير اى سبب او بسبب مش فارقة المهم انهم قرروا يسيبوك وخلاص حتى من غير ما تعرف انت جرحتهم فى ايه ولا حتى زعلتهم فى ايه ومع ذلك بتفضل عايش بيهم ليه ؟؟؟؟؟؟؟؟ وده سؤال مالوش اجابه جواك أو يمكن اجابته أنك أرتبطت بيهم لدرجة أنك مش مصدق أنهم فى يوم من الأيام ممكن يسيبوك.
طبعا ساعتها أنت مش بتستوعب الصدمة وتفضل مقتنع انهم لسه معاك وتفضل تعيش مع السراب ده لغاية ما تيجى لك صدمة تفوقك من الوهم ده وتقول لك فوق ده سراب انت عايش بيه............
فى الحالتين الصدمة بتكون صعبة لانك فى الحالتين مش بتكون ممهد للبعد لانك متخيل ان اللى بيحبوك مستحيل يسيبوك وحتى لو سابوك انت مش بتسيب السراب بتاعهم بتفضل عايش معاه
مفيش مشكلة أننا نحلم ونعيش مع اللى بنحبهم حتى لو كانوا ماتوا أو القدر فرقهم عننا بس برضه لازم نعيش فى الواقع ونعترف ان اللى بيروح عمره ما بيرجع سواء القدر هو اللى قرر رحيله أو هو نفسه اللى اختار الرحيل فى كلا الاحوال لازم نقتنع ان فيه حياة لازم نرضى بيها ونعيشها زى ما هى ونحقق أحلامنا احنا مش احلام حد غيرنا ونعيش مع الواقع ونبعد عن السراب اللى ممكن ياخدنا لدنيا بعيد ممكن تفصلنا عن حياتنا خالص وساعتها لما نكتشف ان ده كله سراب مش هنعرف نرجع لدنيتنا تانى وكده هنكون خسرنا كل حاجة واولهم نفسنا
بقالى كتير اوى مش دخلت مدونات ولا علقت يمكن سنة واكتر بس لما قريت البوست ده حسيت انى عاوز ارد لانه فيه شوية بس الطرف التانى الى هو ساب ممكن عاوز ارد لانه مكان هتقدر اتكلم فيه براحتى من غير مااخاف او احرج ان الى قدامى يفهمنى غلط او ياخد كلامى ويأذى بيه حد دايما حاسس انى متهم جوايا وانى زى كل الى كنت بعيب فيهم واقعد اقول حرام الى بيعملوه فى بنات الناس وكنت ببصلهم انهم حرام عليهم يكونوا بنى ادمين لحد مابقيت واحد منهم انا سبت من غير اى مبرر سبت فى يوم وليله بعد ارتباط سنة كان عندى مبرراتى ومبرراتى كانت اقوى من مبررات ارتباطى قيم طول عمرى مؤمن بيها ومفاهيم طول عمرى واثق من صحتها مااتحقتش فى ارتباطى زى خطوط كده طول عمرى مؤمن بيها انها لو اتجاوزت الخطوط دى مش هينفع يكون فيه ثقه وهيكون فى شك وهتبقى حياه جحيم حاولت اكتر من مره انى اغير الى معايا بس مش كان بيستجيب وانا عذره انه مش يستجيب لان ده اسلوب حياه عايش بيه طول عمرة وحاجات برده حصلت منه وانا الى طلبتها بس طلبتها وانا عاوز اسمع رفض بس مش لقيته لحد ماايقنت انى لو كملت متاكد انى هدمر حياه الى معايا مش مبرر والله العظيم انى سبت بقالى اكتر من سنه كل يوم بموت فيها وبندم على قرارى بس عارف انى لو رضخت لمشاعرى هيرجع نفس تفكيرى زى ماكان الاول وهقرر برده اسيب مش كان ينفع انى اقول واصارح الطرف الى معايا لان ساعتها هكون زى مابقتله بسكينه لانى هعيب فيه لو صارحته وهينجرح جرح مستحيل يتقفل وكانت دى برده هتبقى النهاية مش عاوز اكون شهم ولا عاوز اكون مثالى بس انا عندى لما يحس الى معايا الى ارتبط بيه هو الى كان انانى وهو الى غدر بيه وطلع بيتسلى احسن من انه يحس انه هو كان السبب برده مش قدرت ادافع اوى ولا اوصل الى جوايا بس فى كلام بين السطور ممكن يتفهم ومش دايما الى بيسيب هو الى بيكون غدار
ردحذفأنا ضد تضييع الوقت في الحزن على الغدارين !!
ردحذفيعني ممكن نحزن شوية على نفسنا لو حد سابنا و مشي غدراً بنا ..
لكن ماتوصلش بقى لمرحلة تضييع النفس و الارتباط المرضي جداً دة اللي بيكون محتاج علاج .
كل سنة و انتي طيبة
غير معروف:
ردحذفمن كلامك توقعت أنك ولد هاقول لك حاجة اللى عاوز يسيب حد كان مرتبط بيه مش يسيبه كده من غير ما يوضح له مبرراته ولازم تكون مبررات حقيقية مهما كان صدقنى يمكن تكون قاسية على الطرف التانى بس هتريحه لانه هيعرف اسباب فراقك ليه بس اكبر الم انك تسيبه من غير اى مبرر صدقنى دى بتقتله خصوصا لو كان بيحبك قوى مفيش مشكلة انك تفارق حد بتحبه بس فارقه وانت سايب جواه ذكرى حلوة يفتكرك بيها
ثانيا : أنت بتقول ان انت عندك مبادئ الطرف التانى مش قدر يستوعبها وانت حاولت تغير فيه ومش قدرت ده مش مبرر انك تسيب حد انت بتحبه ده لو كنت فعلا بتحبه اللى بيحب بيفضل جنب اللى بيحبه بيتقبل عيوبه قبل مميزاته ويحاول يغيره على قد ما يقدر ومش يمل ابدا منه بالعكس يحاول لاخر نفس ده لو باقى عليه فعلا
ثالثا: مش تحط حد بتحبه موضع اختبار وتنتظر منه رد معين ساعات هو ممكن يعمل حاجات هو نفسه مش مقتنع بيها بس لمجرد انه يرضيك رغم ان الحاجات دى مستحيل كان ممكن يعملها لو كان هو صاحب القرار
لو كنت بتحبه بجد كنت هتحاول تغير حاجات كتير خانقاك بس لمجرد انه جنبك وصدقنى بقى صعب قوى اننا نلاقى حب حقيقى فى الدنيا دى ولو لاقيناه لازم نتمسك بيه ومش نتخلى عنه ابدا
اوعى تجرح تانى ابدا لان جرح القلوب صعب قوى انك ترجع تداويه خصوصا لو قلب حد كان بيحب بكل ما فيه
شكرااااااااااااا لتعليقك وشرفت مدونتى
اللى بيسيب يكون غدار فى حالة واحدة لو كان مش صادق مع اللى بيحبه من الاول ودخله معاه فى دوامه هو عارف نهايتها ومع ذلك مصر انه يلعب بيه وبمشاعره
ردحذففارق بس فارق برفق من غير ما تجرح ولا توجع قلب كان بيحب بصدق
شوشو:
ردحذفصدقينى دى حاجة مش بايدينا للاسف الصدمة بتخلينا مش متقبلين فكرة انهم سابونا كده من غير مبرر علشان كده بنحاول نضحك على نفسنا انهم لسه معانا وهما فى الحقيقة مجرد سراب
كل سنة وانتى طيبة وعيد سعيد عليكى